शिक्षाको दीप : सप्तश्री ज्ञानपीठ
कालेबुङको शैक्षिक, सामाजिक तथा सांस्कृतिक परिवेशमा आफ्नो छुट्टै पहिचान स्थापित गर्दै आएको सप्तश्री ज्ञानपीठ केवल एउटा विद्यालयको नाम मात्र होइन, यो ज्ञान, संस्कार, अनुशासन, सिर्जनशीलता र मानवीय मूल्यको उज्यालो दीप हो। विगतदेखि वर्तमानसम्मको यसको शैक्षिक यात्राले अनेकौँ विद्यार्थीको भविष्यलाई उज्यालो बनाउँदै आएको छ। शिक्षालाई जीवन परिवर्तनको आधार मान्दै सप्तश्री ज्ञानपीठले विद्यार्थीभित्र रहेको अन्तर्निहित प्रतिभा, क्षमता र सम्भावनालाई पहिचान गरी त्यसलाई सही दिशातर्फ उन्मुख गराउने प्रयास गर्दै आएको छ।
श्रद्धावान् व्यक्तिले ज्ञान प्राप्त गर्छ—भन्ने आदर्श वाक्यलाई आत्मसात् गर्दै विद्यालयले शिक्षा र संस्कारबीचको गहिरो सम्बन्धलाई सदैव महत्त्व दिएको छ। यहाँ शिक्षा केवल परीक्षामा राम्रो अङ्क प्राप्त गर्ने माध्यम होइन, शिक्षा भनेको असल सोच, सही दृष्टिकोण, जिम्मेवारीबोध, आत्मविश्वास, अनुशासन र चरित्र निर्माण गर्ने प्रक्रिया हो भन्ने मान्यता स्थापित गरिएको छ।
आजको प्रतिस्पर्धात्मक युगमा विद्यार्थीलाई केवल पुस्तकको ज्ञानले मात्र पर्याप्त हुँदैन। उनीहरूमा आलोचनात्मक चिन्तन, सिर्जनात्मक क्षमता, समस्या समाधान गर्ने दक्षता, नेतृत्व क्षमता तथा सामाजिक उत्तरदायित्वको भावना पनि विकास हुन आवश्यक छ। यही आवश्यकतालाई ध्यानमा राख्दै सप्तश्री ज्ञानपीठले विद्यार्थीको समग्र व्यक्तित्व विकासलाई आफ्नो शैक्षिक यात्राको महत्त्वपूर्ण आधार बनाएको छ।
विद्यालयका कक्षाकोठाहरू ज्ञान प्रदान गर्ने स्थान मात्र नभई प्रश्न गर्ने, सोच्ने, खोज्ने, सिर्जना गर्ने र आफ्ना सम्भावनालाई परीक्षण गर्ने प्रयोगशालाका रूपमा विकसित हुँदै गएका छन्। शिक्षक–शिक्षिकाको समर्पण, मार्गदर्शन र निरन्तर प्रेरणाले विद्यार्थीहरूलाई आफ्ना कमजोरी पहिचान गर्दै क्षमतालाई अझ निखार्ने अवसर प्रदान गरेको छ।
सप्तश्री ज्ञानपीठको गौरव केवल शैक्षिक परिणाममा मात्र सीमित छैन। खेलकुद, साहित्य, कला, संस्कृति, वक्तृत्वकला, सिर्जनात्मक गतिविधि तथा विभिन्न अतिरिक्त क्रियाकलापमा विद्यार्थीहरूले प्राप्त गर्दै आएका उपलब्धिहरूले विद्यालयको शैक्षिक दृष्टिकोण कति व्यापक छ भन्ने प्रमाणित गर्दछ। कक्षाकोठाभित्रको प्रतिभालाई मैदान, मञ्च र समाजसम्म पुर्याउँदै विद्यालयले विद्यार्थीहरूलाई आफ्नो क्षमता प्रदर्शन गर्ने प्रशस्त अवसर प्रदान गर्दै आएको छ।
खेलकुदको क्षेत्रमा विद्यार्थीहरूले जिल्ला, राज्य तथा राष्ट्रियस्तरसम्म आफ्नो प्रतिभा प्रस्तुत गर्नु विद्यालयका लागि गर्वको विषय बनेको छ। त्यस्तै, साहित्य, भाषा र संस्कृतिप्रतिको रुचिलाई प्रोत्साहन गर्दै विद्यार्थीहरूमा आफ्नो भाषा, पहिचान, परम्परा र सांस्कृतिक सम्पदाप्रति सम्मानको भावना विकास गर्ने कार्य पनि निरन्तर भइरहेको छ।
सप्तश्री ज्ञानपीठका शिक्षकहरू विद्यार्थीका लागि केवल विषयगत ज्ञान दिने गुरु मात्र होइनन्, उनीहरू मार्गदर्शक, प्रेरणास्रोत र चरित्र निर्माणका सहयात्री पनि हुन्।
विद्यालयको यात्रामा संस्थापकहरूको दूरदृष्टि, व्यवस्थापनको प्रतिबद्धता, शिक्षक–शिक्षिकाको अथक परिश्रम, अभिभावकको निरन्तर साथ र विद्यार्थीहरूको लगनशीलता जोड़िएको छ। यी सबै पक्षको सामूहिक प्रयासले सप्तश्री ज्ञानपीठलाई निरन्तर अगाड़ि बढ़ाइरहेको छ।
(पुनश्च: लेखनमा रूचि हुने नवपुस्ताको लागि विशेष गरी विद्यार्थीहरूको लागि यो स्तम्भ 'नवाङ्कुर' तयार पारिएको हो। हामी विद्यार्थी र नवयुवाहरूलाई बिना कुनै सङ्कोच लेख्न, आफ्ना विचारहरू साझा गर्न र आफ्नो सिर्जनशीलता व्यक्त गर्न हार्दिक प्रोत्साहन गर्दछौँ। लेखनले नवयुवा र विद्यार्थीहरूमा आत्मविश्वास, कल्पनाशीलता, र आफू अनि आफ्ना वरपरको संसारलाई अझ गहिरोसँग बुझ्न मद्दत गर्दछ भन्ने हाम्रो अड़ान छ। हामी शिक्षकहरूलाई पनि आफ्ना विद्यार्थीहरूलाई लेख्न अभिप्रेरित तथा मार्गदर्शन गर्न र उनीहरूलाई आफ्ना विचारहरू व्यक्त गर्ने अवसर प्रदान गरिदिन अनुरोध गर्दछौँ।)
नयाँ कलमबाट यतिको स्पष्ट भाषामा कुनै पनि विषयको वर्णन लेखिनु प्रशंसायोग्य छ। लेखिकालाई बधाई र शुभकामना छ।
ReplyDelete